12 minatorë të vrarë nga një sulm rus me dron në Ukrainë
Të paktën 12 minatorë janë vrarë nga një sulm rus me dron në lindje të Ukrainës, ka bërë të ditur kompania më e madhe private energjetike e vendit, DTEK. Sipas kompanisë, një autobus që po transportonte punëtorët pas përfundimit të ndërrimit të punës është goditur të dielën në rajonin e Dnipropetrovskut. Nga sulmi janë plagosur […]
Të paktën 12 minatorë janë vrarë nga një sulm rus me dron në lindje të Ukrainës, ka bërë të ditur kompania më e madhe private energjetike e vendit, DTEK.
Sipas kompanisë, një autobus që po transportonte punëtorët pas përfundimit të ndërrimit të punës është goditur të dielën në rajonin e Dnipropetrovskut. Nga sulmi janë plagosur edhe të paktën shtatë persona.
Fillimisht u raportua për 15 viktima, por më pas numri u korrigjua në 12 të vdekur.
Ndërkohë, sulme të tjera ruse gjatë natës dhe të dielën kanë shkaktuar edhe viktima të tjera. Të paktën dy persona janë vrarë dhe nëntë të tjerë janë plagosur në zona të ndryshme të Ukrainës.
Në Zaporizhzhia, gjashtë persona u plagosën pasi një dron goditi maternitetin nr. 3 në rrugën Bocharova.
Mes të plagosurve ishin edhe dy gra që po lindnin në momentin e sulmit. Kryetari i rajonit, Ivan Fedorov, e cilësoi këtë si “dëshmi të mëtejshme të një lufte të drejtuar kundër jetës”.
Pamje të shpërndara në rrjetet sociale tregojnë dëme të mëdha në spital: dritare të thyera, dhoma pacientësh të mbuluara nga rrënojat dhe shenja zjarri në disa pjesë të ndërtesës. Në disa video shihen zjarrfikës duke evakuuar pacientët.
Ministri i Jashtëm i Ukrainës, Andriy Sybiha, tha se sulmi ndaj spitalit dëshmon se presidenti rus Vladimir Putin po zhvillon “një luftë kundër civilëve, në kundërshtim me përpjekjet për paqe”, raporton BBC.
Në sulme të tjera, një burrë dhe një grua u vranë në qytetin Dnipro nga një sulm me dron, ndërsa një 72-vjeçar u plagos në Nikopol. Në Kherson, një grua 59-vjeçare u plagos rëndë nga granatimet, ndërsa tre persona të tjerë u plagosën në Kharkiv.
Këto zhvillime vijnë në kohën kur Rusia ka intensifikuar sulmet ndaj infrastrukturës energjetike të Ukrainës, duke ndikuar furnizimin me energji elektrike dhe ngrohje gjatë një dimri jashtëzakonisht të ftohtë, me temperatura që në disa zona pritet të zbresin nën -20 gradë Celsius.
Presidenti amerikan Donald Trump kishte deklaruar më herët se Vladimir Putin kishte pranuar të ndalonte sulmet për shkak të motit të ftohtë, por Kremlini tha se pauza do të përfundonte të dielën.
Ndërkohë, presidenti ukrainas Volodymyr Zelensky njoftoi se raundi i dytë i bisedimeve trepalëshe mes Ukrainës, Rusisë dhe SHBA-së për përfundimin e luftës do të mbahet të mërkurën në Abu Dhabi, dhe jo të dielën siç ishte planifikuar fillimisht. Ai nuk dha arsye për shtyrjen.















