Si pasojë e erërave të forta që kanë përfshirë sot Prishtinën dhe Fushë Kosovën, ekipet emergjente kanë realizuar gjithsej 17 intervenime në terren për të menaxhuar dëmet dhe rreziqet e shkaktuara.
Sipas njoftimit të Drejtorisë për Siguri dhe Emergjenca në Komunën e Prishtinës, në aksion kanë qenë të angazhuara Brigada Profesionale e Zjarrfikësve, ekipet e Drejtorisë për Siguri dhe Emergjenca, Ndërmarrja Publike “Gjelbër” dhe Drejtoria e Policisë së Kryeqytetit, njofton Dukagjini.
Intervenimet janë kryer kryesisht në largimin e kulmeve, llamarinave, reklamave, tjegullave dhe drunjve të rrëzuar, si dhe në trajtimin e disa rasteve të zjarreve.
Nga Drejtoria për Siguri dhe Emergjenca bëhet e ditur se aktualisht dy intervenime vazhdojnë të jenë aktive, ndërsa ekipet emergjente ndodhen ende në terren.