Të paktën 25 persona kanë humbur jetën pas një sulmi vetëvrasës me bombë në kishën Mar Elias në Damask të dielën, ka raportuar agjencia shtetërore siriane e lajmeve, SANA, duke cituar Ministrinë e Shëndetësisë.

Ky është sulmi i parë i këtij lloji në kryeqytetin sirian që nga rrëzimi i presidentit Bashar al-Assad në dhjetor, pas një kryengritjeje të udhëhequr nga grupet islamiste.

Sipas Ministrisë së Brendshme të Sirisë, sulmuesi ishte një ekstremist i lidhur me grupin terrorist Shteti Islamik (ISIS).

Ai ka hyrë në kishë i armatosur dhe me fytyrë të mbuluar, ka hapur zjarr ndaj besimtarëve, e më pas ka aktivizuar një jelek me eksploziv që mbante në trup.

Dëshmitarët tregojnë se besimtarët tentuan ta ndalonin dhe ta largonin nga ambientet e kishës, por në atë moment ai shpërtheu eksplozivin, duke shkaktuar viktima të shumta në mesin e të pranishmëve.

Deri tani, asnjë grup nuk e ka marrë përgjegjësinë për sulmin.