Kryetari i Partisë Demokratike të Kosovës (PDK), Memli Krasniqi, e ka përkujtuar 25-vjetorin e Betejës së Koshares dhe thyerjes së kufirit Kosovë-Shqipëri.
Krasniqi ka thënë se kjo betejë i ka dhënë luftës çlirimtare një frymë tjetër që sipas tij, “do të frymëzonte zemrat e çdo shqiptari të etur për liri”.
Kreu i PDK-së ka thënë se Beteja e Koshares një nga fitoret e mëdha të UÇK-së, si paralajmërim për fitoren përfundimtare që do të vinte dy muaj më vonë.
“Lavdi dëshmorëve të Koshares! Respekt dhe mirënjohje e përheshme veteranëve!”, ka shkruar i pari i partisë opozitare.
Beteja e Koshares më 9 prill 1999, në kuadër të operacionit “Shigjeta”, është njëra ndër më të përgjakshmet dhe më heroiket e luftës së Ushtrisë Çlirimtare të Kosovës.
Thyerja e kufirit në mes të Kosovës dhe Shqipërisë shënoi jo vetëm një fitore morale për UÇK-në, por ajo i hapi rrugë furnizimit me armatim dhe mbështetje logjistike për shumë zona të luftës në brendësi të Kosovës.
Lexo më shumë: 25 vjet nga Beteja e Koshares dhe thyerja e kufirit Kosovë-Shqipëri
Përpjekjet për të arritur një marrëveshje që forcat serbe të tërhiqeshin nga territori i Kosovës, kishin rezultuar pa sukses. Ndërkohë, pas Rambujesë ishte formuar Qeveria e Përkohshme e Kosovës dhe caqet ushtarake dhe paramilitare serbe ishin sulmuar nga forcat e aleancës veri-atlantike NATO.
Në aspektin strategjik beteja e Koshares kishte rëndësi të veçantë jo vetëm marrjen dhe pastrimin e kufirit por edhe krijimit të prapavijës së qëndrueshme për mbështetje dhe operacione logjistike, ndihmë mjekësore e të tjera.