Sot, më 28 nëntor, shënojmë ditëlindjen e komandantit legjendar, Adem Jashari, një figurë e shquar e Luftës së Pavarësisë në Kosovë. Nëse ai do të ishte gjallë, do të kishte mbushur 68 vjet. Adem Jashari, i lindur në Prekaz të Skenderajt më 1955, ishte djali i tretë i Shaban dhe Zahide Jasharit dhe mbaroi shkollën e mesme teknike në Skenderaj.
Përkundër shuarjes së të gjitha institucioneve të Kosovës në vitin 1990, Adem Jashari u organizua në aspektin ushtarak përmes LPK-së. Duke filluar me vitin 1991, ai dhe një grup veprimtarësh shqiptarë shkuan në Shqipëri për t’i kryer ushtrimet dhe stërvitjen e duhur ushtarake për luftën e armatosur.
Historia e heroit tonë shpërtheu në vitin 1997, me sulmin e UÇK-së në 12 stacionet policore.
Nga aksionet e armatosura kundër forcave policore që kryente UÇK-ja, pas shtimit të dhunës sistematike të forcave serbe nëpër Kosovë, kalohet në një fazë tjetër të ndeshjes së drejtpërdrejtë me forcat serbe, pra në beteja, në fundin e nëntorit 1997, kur në Rezallë të Re luftohet me forcat e shumta të policisë serbe.
Në këtë betejë i ndërpritet rruga kolonës së armatosur rëndë të forcave serbe, që kishin mësyrë një sulm në fshatin Vojnik, ku një ditë më parë, patrullat e maskuara të policisë serbe ishin gjuajtur me armë zjarri njërin prej luftëtarëve të hershëm të UÇK-së, Abedin Rexha – Sandokani.
Në këtë betejë printe Adem Jashari dhe luftëtarë të tjerë si Mujë Krasniqi, Rexhep Selimi, Sylejman Selimi, Ilaz Kodra, Ilaz Dërguti etj.
Kjo është beteja e parë dhe fitorja e njësitit të UÇK-së.
Beteja në Prekaz më 1998, ku Jasharët treguan guxim dhe rezistencë heroike për tre ditë, shënon një epokë në historinë e Kosovës. Pas një sulmi masiv të policisë serbe, Adem Jashari dhe familja e tij mbrojtën vendin me lavdi.
Policia serbe kishte shënjuar që moti shtëpinë e Jasharëve.
Më 5 mars 1998, në orët e hershme, forca të mëdha të policisë serbe kishin mësyrë Prekazin.
Një pikë zjarri, e stacionuar që herët në lokacionin e fabrikës së municionit, që ishte në afërsi të shtëpisë së Jasharëve, ishte përforcuar me mjete të rënda artilerike.
Përforcimet e forcave serbe kishin ardhur edhe nga drejtimi i Klinës, Mitrovicës dhe Gllogovcit. Sulmi mbi Jasharët nis rreth orës gjashtë të mëngjesit dhe qëndresa heroike e tyre zgjati tri ditë: më 5, 6 dhe 7 mars 1998.
Kjo luftë heroike njihet si “Epopeja e Ushtrisë Çlirimtare të Kosovës.”
Ademi Legjendar ra dëshmor më 7 mars të 1998-tës, bashkë me të edhe 58 anëtarë të tjerë të familjes, pasi rezistencës përballë 7 deri në 8 mijë trupave të ushtrisë serbe.
Adem Jashari u nderua me titullin “Hero i Kosovës” nga ish-presidenti Fatmir Sejdiu.
Figura e tij dhe sakrificat për lirinë janë vlerësuar nga personalitete të rëndësishme, duke përfshirë administratorin e parë ndërkombëtar të Kosovës, Bernar Kushner, i cili ka thënë se nëse do të kishte Çmim Nobel për sakrificë për liri, ai do t’i takonte Adem Jasharit dhe familjes së tij.