Disa ditë më parë qarkullonte një video në rrjetet sociale, ku reperi Fero po ushtronte dhunë ndaj një pasagjeri në makinë, në qytetin e Gjilanit.
Gjykata e Gjilanit i ka shqiptuar masën prej 30 ditësh paraburgim.
Gjykata ka bërë të ditur se i dëmtuari ishte duke dëgjuar muzikë në makinën e brendit Golf 6 me ngjyrë të bardhë, ku po qëndronte i ulur si pasagjer dhe në ato momente u sulmua nga Fero.
“Ekziston dyshimi i bazuar se me datë 24.07.2022 rreth orës 17:00, në Rrugën “Mulla Idrizi” në Gjilan, në rrugë dhe vend publik, i pandehuri pas një mosmarrëveshje të rastit me të dëmtuarin E. E.” Shkruhet në njoftimin e Gjykatës Themelore të Gjilanit.
Reperi dyshohet se ka kryer veprën penale, sulmi e cila është vepër e sanksionuar me Kodin Penal të Republikës së Kosovës.
Sipas njoftimit, gjyqtari i procedurës paraprake ka vlerësuar se qëndrojnë arsyet ligjore për caktimin e masës së paraburgimit ndaj të pandehurit, pasi që masat tjera alternative do të ishin të pamjaftueshme në këtë fazë të procedurës penale.
I dyshuari e ka goditur të dëmtuarin me grushte dhe shkelma disa herë në pjesë të ndryshme të trupit, deri sa disa persona të tjerë kanë ndërhyrë që ta largojnë të pandehurin.