Inspektorati Policor i Kosovës ka njoftuar se u është caktuar masa e paraburgimit pesë zyrtarëve policorë në lidhje me rastin e vdekjes së 27-vjeçarit.

Në një komunikatë IPK-ja ka thënë se hetuesit e saj në koordinim të vazhdueshëm me Prokurorinë e Shtetit janë duke vazhduar të ndërmarrin veprime hetimore lidhur me vdekjen e një qytetari në Lipjan dhe reagimit të zyrtarëve policorë në këtë incident .

“Sot në orët e mbrëmjes, me autorizim të Prokurorisë Themelore në Prishtinë  janë ftuar për intervistim në IPK në cilësinë e të dyshuarve pesë zyrtarët policorë të përfshirë në këtë ndërhyrje/reagim policor (një rreshter dhe katër zyrtarë policorë). Pas intervstimit të tyre dhe pas administrimit edhe me dëshmitë e tjera që janë siguruar sot pas veprimeve hetimore, që të pesë zyrtarët policorë janë arrestuar si të dyshuar kurse me vendim të prokurorit të njëjtëve u është caktuar masa e ndalimit për 48 orë”, thuhet në njoftim.

Në kuadër të hetimit, IPK-ja ka njoftuar se pritet të ndërmerren edhe shumë veprime tjera hetimore drejt ndriçimit të të gjitha rrethanave lidhur me këtë incident si dhe priten edhe rezultatet e ekzaminimeve përfshirë ato mjeko-ligjore.

Për veprën “vrasje nga pakujdesia” janë ndaluar pesë zyrtarët policorë që morën pjesë në arrestimin e 27-vjeçarit në Lipjan i cili më pas vdiq. Këtë e ka konfirmuar për Radio Dukagjinin, Kaltrina Shala, Zedhenese ne Prokurorine Themelore ne Prishtine.

Për të njëjtit, Inspektorati Policor ka kërkuar më herët suspendim, duke thënë se janë po intervistohen dëshmitarë, si dhe ka filluar mbledhja e provave materiale, incizimeve nga kamerat e sigurisë dhe incizimet nga telefonat mobil.

Bëhet fjalë për katër policë dhe një rreshter.

27-vjeçari, Agon Zejnullahu, ka vdekur në orët e para të së hënës, pak pasi është arrestuar nga policia në Lipjan, për shkak të dyshimeve se po sulmonte automjete e kalimtarë.

E, Alban Zejnullahu, vëllai i të ndjerit ka thënë se Agoni vdiq si pasojë e dhunës së ushtruar nga policia gjatë arrestimit.