Bazuar në një sondazh në kuadër të OMNIBUS-it, që realizohet nga UBO Consulting për matjen e opinionit publik e të porositur nga RTV Dukagjini, 50.50 për qind (%) e mbështesin Asociacionin e Komunave me Shumicë serbe, si kompromis që do ta mbështeste elektorati në Kosovë.
Kurse, ripërcaktimi i kufijve me Serbinë e ka një mbështetje prej 49.50 për qind.
Kështu bëri të ditur drejtori ekzekutiv në TV Dukagjini, Ermal Panduri, në emisionin “Five”, në RTV Dukagjini, teksa prezantoi të dhënat e fundit, ku RTV Dukagjini ka përfshirë disa pyetje.
Panduri tha se nuk është se është ofruar një opsion i tretë, ngase siç thotë ai, palët apo elektorati në Kosovë janë të ndarë në mes të dy zgjidhjeve.
“Sepse zgjidhja e tretë nuk është se ekziston në tavolinë”, tha ai.
OMNIBUS-i bëhet në baza të rregullta çdo tre muaj.
Të anketuar janë 1 mijë e 66 persona dhe të dhënat janë mbledhur në mes të datës 16 dhe 23 dhjetor.