Policia Rajonale e Ferizajt ka intensifikuar gjatë muajit gusht kontrollet në trafik, me fokus të veçantë te drejtuesit e motoçikletave, skuterëve dhe trotinetëve.
Si rezultat i kontrolleve, janë shqiptuar gjithsej 50 gjoba ndaj drejtuesve të motoçikletave për shkelje të rregullave të komunikacionit. Ndërkaq, janë konfiskuar 14 motoçikleta/skuterë dhe 8 trotinetë, kryesisht për mungesë të dokumentacionit të rregullt.
Nga 50 gjobat e shqiptuara, 27 kanë qenë për drejtim të motoçikletës pa patentë shofer, 11 për drejtim pa regjistrim, 4 për mosmbajtje të helmetës mbrojtëse, ndërsa 8 për kundërvajtje të tjera.
Aktiviteti është realizuar në kuadër të planit operativ “Kontrolli i shtuar i qarkullimit të motoçikletave dhe trotinetëve”.
Policia ka apeluar te drejtuesit që të respektojnë rregullat e trafikut dhe të përdorin pajisjet mbrojtëse.
“Ngasja e papërshtatshme e motoçikletave dhe mosrespektimi i rregullave të trafikut rrezikon drejtpërdrejt jetën e drejtuesit dhe të gjithë pjesëmarrësve në komunikacion”, thuhet në njoftimin e Policisë.
Policia ka bërë të ditur se kontrollet do të vazhdojnë edhe në ditët në vijim, me qëllim rritjen e sigurisë në trafik dhe parandalimin e aksidenteve rrugore.