Ka nisur protesta gjithëpopullore në sheshin “Skënderbeu” në Prishtinë, e thirrur nga Organizata e Veteranëve të Luftës së UÇK-së me moton “Në mbrojtje të UÇK-së”.
Protestës i është bashkuar edhe kryetari i Partisë Demokratike të Kosovës, Bedri Hamza, së bashku me deputetë të kësaj partie dhe ish-kryetarin e PDK-së, Memli Krasniqi.
Në protestë është parë edhe Endrit Thaçi, djali i ish-presidentit Hashim Thaçi. Ai është parë pranë Hamzës dhe Krasniqit.
Protesta zhvillohet dy ditë pas shpalljes së aktgjykimit të shkallës së parë ndaj ish-krerëve të UÇK-së në Hagë.
Qytetarë, veteranë të luftës dhe përfaqësues politikë janë mbledhur në sheshin “Skënderbeu”, ndërsa protesta është thirrur në kundërshtim me vendimin e Dhomave të Specializuara të Kosovës në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit.