Nafta shënon rënie të lehtë në çmim në Kosovë.
Sipas njoftimit të Ministrisë së Industrisë, Ndërmarrësisë, Tregtisë dhe Inovacionit, nga e marta (14 prill), një litër naftë mund të shitet deri në 1.78 euro, nga 1.84 euro sa ishte një ditë më parë.
Ndërkohë, çmimet e benzinës (1.44 euro për litër) dhe gazit (0.89 euro për litër) kanë mbetur të pandryshuara.
Nafta ishte shtrenjtuar pas përshkallëzimit të tensioneve në Lindjen e Mesme, pas raportimeve për konflikt mes Shteteve të Bashkuara të Amerikës dhe Izraelit me Iranin, çka solli edhe mbylljen e Ngushticës së Hormuzit, një prej rrugëve më të rëndësishme detare për transportin e rreth 20 për qind të naftës botërore.
Pas arritjes së një armëpushimi javën e kaluar, çmimet në tregjet ndërkombëtare filluan të bien, megjithatë në Kosovë kjo ulje u reflektua shumë pak.
Ndërkohë, negociatat e fundit mes Iranit dhe SHBA-së kanë dështuar, pasi palët nuk kanë arritur marrëveshje për një zgjidhje të qëndrueshme.