Kryetari i Komunës së Malishevës, Ekrem Kastrati, ka deklaruar se komuna vazhdon të përballet me pasojat e reshjeve intensive, duke theksuar se ende nuk ka marrë mbështetje nga Qeveria për dëmet e shkaktuara nga fatkeqësitë natyrore.
Sipas Kastratit, problemet në Malishevë kanë nisur që nga përmbytjet e muajit janar, kur u dëmtuan rëndë infrastruktura publike, ekonomitë familjare dhe një digë.
“Komuna e Malishevës po vazhdon të përballet me këto telashe nga reshjet që kohët e fundit kanë qenë intensive dhe me sasi të mëdha. Që nga janari kemi pasur përmbytjet më të mëdha, është dëmtuar një digë, ekonomitë familjare dhe infrastruktura komunale. Vlera e dëmeve të evidentuara arrin në rreth 6.42 milionë euro. Raporti është miratuar në Kuvendin Komunal dhe i është dërguar Qeverisë, por deri më tani nuk kemi marrë asnjë përgjigje”, tha Kastrati.
Ai bëri të ditur se reshjet e fundit kanë shkaktuar dëme të reja, duke prekur shtatë shkolla në territorin e komunës.
“Shtatë shkolla janë dëmtuar në fasadat e jashtme, çatitë dhe pullazet. Gjithashtu ka dëmtime në ura, në rrjetin e kanalizimit dhe të ujërave të zeza, ndërsa dëme të mëdha janë shkaktuar edhe në bujqësi, ku janë dëmtuar serrat e fermerëve”, u shpreh ai.
Kastrati theksoi se komisioni komunal është duke vazhduar vlerësimin e dëmeve të shkaktuara nga reshjet e fundit, ndërsa përsëriti se deri tani nuk ka pasur asnjë ndihmë financiare nga niveli qendror.
“Komisioni është në terren dhe po bën vlerësimin e dëmeve. Megjithatë, ndihma nga Qeveria ende nuk ka ardhur, pavarësisht dëmeve të mëdha që ka pësuar komuna”, përfundoi ai.