Drejtori i Përgjithshëm i Policisë së Kosovës, Gazmend Hoxha, ka bërë të ditura detajet e operacioneve policore të zhvilluara në 48 lokacione në zonat përreth Zubin-Potokut.

Në konferencën për media, Hoxha tha se pas pranimit dhe verifikimit të informacioneve, Policia e Kosovës ka realizuar kontrolle në këto lokacione, ku janë gjetur dhe sekuestruar sasi të konsiderueshme armësh, municioni, mjete shpërthyese dhe pajisje ushtarake.

Sipas të dhënave të prezantuara, në mesin e arsenalit të konfiskuar janë:

  • 72 copë armë;
  • 2 mitralozë;
  • 11 armë të gjata AK-47;
  • 22 armë të gjata të llojeve të ndryshme;
  • 27 pushkë gjuetie;
  • 90 armë të shkurtra – pistoleta të llojeve të ndryshme;
  • 7 mjete shpërthyese;
  • 7 granata dore;
  • 2 detonatorë;
  • pjesë plastike për paketimin e granatave;
  • 4 mijë e 831 copë municion të kalibrave të ndryshëm;
  • mjete piroteknike;
  • pjesë metalike të mjeteve shpërthyese;
  • pjesë të armëve, tyta dhe karikatorë;
  • pajisje të tjera ushtarake;
  • thika, gazmaska, radiolidhje dhe dylbi;
  • arka druri për municion;
  • uniforma ushtarake;
  • këmisha të ushtrisë dhe policisë.

Gjatë operacionit janë sekuestruar edhe dokumente të ndryshme, përfshirë libreza të armëve të ish-Jugosllavisë, kartela të veteranëve, dokumente të armëve, dokumente të rojeve të pyjeve dhe leje të skaduara për armë të shkurtra.

Në mesin e dëshmive të konfiskuara janë edhe mjete financiare, përkatësisht 96 mijë e 100 euro dhe 5 mijë franga.