Forca e Sigurisë së Kosovës do të marrë pjesë me 10 oficerë në tre kurse profesionale që kanë nisur në Kolegjin e Mbrojtjes dhe Sigurisë në Shqipëri.
Ministri i Mbrojtjes i Shqipërisë, Ermal Nufi, ka njoftuar se në këto kurse do të marrin pjesë gjithsej 75 oficerë, 65 prej tyre nga Forcat e Armatosura të Shqipërisë dhe 10 nga FSK-ja, njofton Dukagjini.
Nufi, mes tjerash, vlerëson se dija, profesionalizmi dhe lidershipi janë pjesë e rëndësishme e transformimit të forcave të armatosura dhe e synimit për ndërtimin e një force moderne, të aftë dhe plotësisht të ndërveprueshme me aleatët.
“Ambicia jonë është e qartë: një Forcë e Armatosur gjithnjë e më profesionale, një aleat gjithnjë e më i aftë dhe njerëz të përgatitur për të marrë përgjegjësi në sfidat e së ardhmes”, ka shkruar ai.
Tutje, Nufi u ka uruar sukses të gjithë kursantëve në këtë rrugëtim të ri profesional.