Në punë ka dal e po bëhet gati që të nisë mësimin. Ditarin po e përgatit para orës mësimore që të jetë gati plotësisht për orën mësimore.
Entuziazmin e ka por shqetësimi i saj është mosprocesimi i pagës ani pse është data 6 e tetorit.
“Bashkë me koleget e mi mësimdhënës kemi mendu se si mund të ja dalim pasi që edhe dimri është afër edhe çmimet janë të ngritur”, ka thënë mësimdhënësja, Ylberina Krasniqi.
Halli tjetër i mësimdhënësve janë edhe kreditë. Ata nuk ia kanë idenë me çfarë do t’i paguajnë.
“Nëse nuk behet ekzekutimi i pagave nuk besoj që do të jetë mirë për asnjërin pasi që shumica e mësimdhënësve janë në kredi dhe shumicën e mësimdhënësve bankat e kanë shti në borxh”, ka shtuar ajo.
Por, janë kryesindikalistët të cilët po besojnë që Qeveria do të zmbrapset nga vendimi i tyre.
“Çdoherë ka ndodhur deri në këtë datë. Ne jemi shumë optimistë që sot eventualisht nesër, Qeveria do të procesojë pagat edhe për sektorin e arsimit që ishte në grevë që të njëjtën e bëri për shërbyesit civilë të cilët po ashtu ishin në grevë. Por duam të besojmë që sot dhe nesër kjo gjë do të rregullohet”, ka theksuar kryetari i SBASHK-ut, Rrahman Jasharaj.
Punëtorët e sistemit arsimor nuk janë paguar për muajin shtator kur ishin në grevë, me arsyetimin se kjo është në kundërshtim me Ligjin për Paga.