Fushë Kosova iu është bërë vend për banim tash e dy dekada por vendlindjen e kanë përtej kufijve.
Janë këta shumë banorë të Luginës së Preshevës që janë të lindur e rritur atje por që për rrethana të ndryshme, kryesisht politike jetojnë tash e disa vjet në Kosovë.
Por, në Serbi ata të gjithë po ballafaqohen me një problem të njëjtë – largimin nga regjistrat e popullsisë.
Pavarësisht kësaj, ata janë të gatshëm që sërish të regjistrohen, tani kur në Serbi është nisur ky proces.
“Na kanë heq prej listave, toka e shpija, atje një vëlla është hala. Më shku shkoj mu regjistru. Krejt i kanë shlyer nga lista s’ka pakë shqiptar janë met. Unë kom qef më shku po s’ki ku rrinë”, ka thënë Qazim Hajdini, banor nga Medvegja.
Ndërsa, Raba Rushiti, banore nga Lugina e Preshevës ka thënë “ Shkoj atje shpesh që 20 vite jam këtu atje i kom vllaznin, po krejt na kanë heq prej listave. Kysmet kom më shku mu regjistru pasi atje s’kemi mujt më marr as letra as kurgja”.
“Na kanë hek prej listave atje që katër vite nuk jam në sistem atje. Nuk kanë dhënë arsye. Kysmet kom më shku mu regjistru se atje jemi lindur e jemi rritu. Shpijat e tokën e kemi atje”, ka thënë Sefer Hyseni, gjithashtu banor nga Medvegja.
Thirrje për regjistrim iu është bërë shqiptarëve të Luginës edhe nga politikanë të këtij rajoni.
“Kemi ftuar shqiptarët t’i përgjigjen regjistrimit pasi është e mirë për shqiptarët e Luginës pasi që do të dëshmoj se nuk është ai numri i shqiptarëve që pretendon Serbia por jemi shumë ma shumë. Ne kemi pas dy takime në Gjilan dhe më kryetarin e Komunës së Gjilanit kemi ftuar qytetarët të vinë dhe të regjistrohen. Është e vërtet se një numër i madh i shqiptarëve që jetojnë në Kosovë dhe në diasporë janë shlyer nga regjistrat prandaj apelojmë që të vijnë dhe të regjistrohen. Mjafton një letër me të dhënat e tyre dhe mund të regjistrohen”, ka thënë kryetari i i Bujanocit, Nagip Arifi.
Në procesin e kaluar të regjistrimit të popullsisë, shqiptarët nuk morën fare pjesë duke e bojkotuar në shenjë revolte.