Kryetari i Aleancës për Ardhmërinë e Kosovës (AAK), Ramush Haradinaj, ka thënë se deklaratat për rritje ekonomike pa fakte janë ofendim për një vend e për një popull të tërë.
Sipas Haradinajt, rritja ekonomike sipas Bankës Botërore është 3.1 për qind e jo 10.5 siç ka potencuar Qeveria.
Haradinaj ka thënë se inflacioni, poashtu sipas Bankës Botërore, është 19.1 për qind.
“S’ka si të jetë ndryshe, kur janë shtrenjtuar të gjithë artikujt e domosdoshëm për jetesë, e qeveria e ka bllokuar Ligjin e Pagave! E ka bllokuar edhe ndërtimin e kapaciteteve të reja energjetike, siç ishte “Kosova e Re” dhe gazsjellësi amerikan, me arsyetime qesharake se megavati prej 80 eurove i dukej i shtrenjtë, e sot, çmimi i tij pothuajse është dhjetëfishuar”, ka shkruar ai në Facebook.
Ndër të tjera, i pari i AAK-së ka thënë se nga 706 milionë të planifikuara me buxhetin e shtetit për investime kapitale, janë realizuar vetëm një e dhjeta e tyre.
Sipas tij, rritje kanë shënuar vetëm importet e mallrave nga Serbia.
“Rritje kanë shënuar vetëm importet e mallrave nga Serbia. Kjo qeveri e ka kapërcyer çdo parashikim dhe importet nga Serbia prej 174 milionë në vitin 2020, kanë mbërritur në mbi 306 milionë euro, që është për 76 % më shumë nga viti paraprak”.