Ministri i Punëve të Brendshme i Maqedonisë së Veriut, Bujar Osmani ka bërë të ditur se janë në pritje të një përgjigje nga Bullgaria për një dokument për zgjidhjen e kontestit mes dy vendeve që tashmë është në Sofje, e për të cilin Shkupi është i gatshëm ta pranoj.
Kryediplomati nga Shkupi nuk ishte i gatshëm ta pohoj ose mohoj se Sofja zyrtare ka dhënë ndonjë sinjal, por se sipas tij kjo do të ishte një marrëveshje gjithëpërfshirëse, për të gjitha dallimet mes dy palëve.
“Ka një dokument të tillë në të cilin ne jemi të gatshëm ta pranojmë, megjithatë derisa nuk marrim përgjigje se pranohet edhe nga pala bullgare, mendoj se nuk mund të njoftoj deputetët dhe opinionin për shkak se mund të refuzohet dhe gjithçka ka qenë e kotë”, është shprehur Osmani pas takimit me ministrin rumun të Punëve të Jashtme, Bogdan Aurescu.
Sipas Osmanit, aktualisht diskutohet që bullgarët të jenë pjesë e Kushtetutës maqedone, respektivisht nëse kjo kërkesë e Sofjes do të përfshihet në kornizën e negociatave dhe në cilën fazë të procesit.
Kurse Presidenti i Bullgarisë, Rumen Radev, nuk pret që të hiqet vetoja dhe ka shprehur besimin se qeveria nuk do ta shkelë Deklaratën bullgare.
“Ka deklarata nga zyrtarë të qeverisë se do të respektohen të gjitha marrëveshjet e arritura, të cilat shprehin qëndrimin tonë kombëtar për këtë çështje”, kishte thënë president bullgar.
Ndërsa kryediplomati rumun, Aurescu, ka thënë se Rumania mbetet mbështetësi më i fortë i Maqedonisë së Veriut drejtë integrimit në Bashkimin Evropian (BE).
Të shtunën, kryeministri bullgar, Kiril Petkov bashkë me zëvendëskryeministrin Ilijana Jotova do vizitojnë Manastirin, por se a do takohen me kryeministrin Kovaçevski nuk dihet ende.