Shkencëtarët kanë zbuluar se të rinjtë me probleme të padiagnostikuara kardiake janë të rrezikuar nëse emocionohen shumë nga lojërat luftarake të stilit Call Of Duty.
Disa fëmijë lindin me një rrahje zemre të parregullt të njohur si aritmi kardiake dhe mund të mos e dinë kurrë nëse nuk zbulohet nga një skanim, shkruan The Telegraph.
Rreth dy milionë njerëz në Mbretërinë e Bashkuar jetojnë me një gjendje të tillë dhe ata mund të bëjnë jetë relativisht normale. Megjithatë, një shpërthim mund të ndodhë në çdo moment dhe të çojë në pasoja të rënda , të tilla si humbja e vetëdijes, arresti kardiak dhe potencialisht vdekje.
Këto probleme të padiagnostikuara të zemrës kanë qenë më parë të lidhura me vdekjet e papritura të njerëzve që luanin sport, por tani një lidhje është parë edhe për lojërat kompjuterike.
Videolojërat luftarake shkaku më i zakonshëm i problemeve
Dr.Claire Lawley, hetuesja kryesore e studimit tha se “Video lojërat mund të përfaqësojnë një rrezik serioz për disa fëmijë me gjendje aritmike. Ato mund të jenë vdekjeprurëse në pacientët me kushte aritmike predispozuese.”
Shkencëtarët tani duan që çdo fëmijë që ka një histori të humbjes së vetëdijes gjatë lojës, të kontrollohet për probleme të mundshme të zemrës pasi mund të jetë një shenjë paralajmëruese e hershme.
Studimi identifikoi 22 raste kur videolojërat shkaktuan humbje të vetëdijes tek fëmijët, me lojërat luftarake me shumë lojtarë, loja më e zakonshme e luajtur në kohën e incidentit.
Në momentet e investimit maksimal emocional, si pas një fitoreje ose humbjeje, fëmijët e cenueshëm janë veçanërisht të rrezikuar nga episodet kardiake, thanë studiuesit.
Christian Turner, bashkautori i studimit, tha: “Video-lojëra ishte diçka që më parë mendoja se do të ishte një ‘aktivitet i sigurt’ alternativ. Ky është një zbulim vërtet i rëndësishëm. Ne duhet të sigurohemi që të gjithë e dinë se sa e rëndësishme është të kontrollohemi kur dikush ka pasur humbje të vetëdijes në këto rrethana.”
Dr.Jonathan Skinner, bashkautor i studimit, tha se ai ishte “i tronditur” kur pa se sa e përhapur është çështja dhe si ka dërguar në vdekje disa fëmijë.