Kryetari i Lëvizjes për Bashkim, Valon Murati e ka vlerësuar angazhimin e kryeministri të Shqipërisë, Edi Rama si një ofensivë kundër raportit të Dick Marty-it, i cili kishte pretenduar se Ushtria Çlirimtare e Kosovës(UÇK), kishte kryer trafikimi të organeve në “Shtëpinë e verdhë” në Shqipëri.
Sipas Muratit, betejën Rama e kishte nisur në Asamblenë e Përgjithshme të OKB-së kundër raportit të Dick Marty-it, në një kohë shumë të favorshme, pra për shkak të rrethanave të reja gjeopolitike që ka shkaktuar lufta në Ukrainë e për të vazhduar edhe në Asamblenë Parlamentare të Këshillit të Evropës.
“Kryeministri i shtetit shqiptar Edi Rama prej verës së këtij viti është në ofensivë në betejën për të çmontuar politikisht dhe juridikisht Raportin e Dick Marty-it nga ku buron Rezoluta 1782 e Këshillit të Evropës të vitit 2011 për çështjen e trafikimit të organeve nga ana e UÇK-së”, ka shkruar Murati në Facebook.
“Nuk ka diçka më shqiptare dhe njëkohësisht njerëzore në betejën me politikën shoviniste serbe dhe atë ruse sesa rehabilitimi i karakterit të luftës çlirimtare të UÇK-së e cila është baza mbi të cilën është ndërtuar liria e Kosovës”, ka shtuar ai.
Por me një çështje, ai nuk është i kënaqur sikurse është me qëndrimin e Edi Ramës, dhe ajo është puna e krerëve të shtetit të Kosovës, që sipas tij ata nuk janë duke u angazhuar për një çështje të tillë.
“Diplomacia e shtetit të Kosovës në të gjitha nivelet, ndonëse nuk i ka mundësitë e mëdha, duke qenë indiferente ndaj kësaj nisme, po tregon një impotencë dhe smirë të pakuptueshme. Historia një ditë do të qesh e qaj me këtë mentalitet provincial që mendon se atdheu dhe bota fillon dhe përfundon në mëhallën tënde”, ka përfunduar Murati.