Është ndalur përkohësisht subvencionimi i eficiencës së enegjisë për qytetarët, për shkak të numrit të madh të qytetarëve të cilët kanë aplikuar për të përfituar nga kjo masë.
Ministria e Ekonomisë, të mërkurën ka bërë të ditur se për shkak të këtij numri të madh të aplikimeve është shteruar buxheti i paraparë për këtë thirrje.
“Thirrja Publike për Subvencionim të Efiçiencës së Energjisë për qytetarët, e hapur me datën 06.10.2022 sot është mbyllur përkohësisht për aplikim pasi që numri i aplikimeve ka shteruar buxhetin e paraparë për këtë thirrje”, thuhet në njoftimin e tyre.
Thirrja për aplikim sipas Ministrisë së Ekonomisë, do të rihapet sapo të shqyrtohen aplikimet nga Komisioni Vlerësues.
“Ky kalkulim është bërë duke u bazuar në kriterin që secili subvencion do të jetë me çmimin maksimal të lejuar, ndërsa thirrja do të rihapet me mjetet e mbetura pasi të shqyrtohen aplikimet e para nga Komisioni Vlerësues për shqyrtimin e aplikacioneve për subvencionim”, thuhet në njoftim.
Numri i aplikuesve sipas Ministrisë së Ekonomisë është 5 mijë e 992.
“Pompë Termike 1313 aplikues, Inverter 2656 aplikues, Kalda me Biomasë 816 aplikues, Stufa me biomasë 1207 aplikues”, thotë njoftimi.
Kurse numri i aplikuesve të cilët janë në kategorinë e mbështetjes së skemës të asistencës sociale është 275.
“Theksojmë se deri më tani numri total i aplikuesve për fazën e dytë është 218. Ndërsa shifra e arritur nga aplikimet është 6,000,020.00 euro”, vijon njoftimi.