Presidentja e Kosovës, Vjosa Osmani, të mërkurën e 19 tetorit do ta vizitojë Klinikën e Onkologjisë në Qendrën Klinike Universitare të Kosovës (QKUK) në kuadër të muajit të ndërgjegjësimit ndaj kancerit të gjirit.
Këtë vizitë do ta vazhdojë pas takimit me emisarin amerikan, Gabriel Escobar.
Në këtë klinikë, me fillim nga ora 11:00, do të bëhet shpërndarja e disa protezave silikoni, proteza gjoksore dhe paruke për gratë e prekura nga kanceri i gjirit.
Ky projekt është mbështetur nga Presidenca e Kosovës.
“Ju informoj se më datë 19 Tetor, në orën 11:00 në Klinikën e Onkologjisë do të bëhet shpërndarja e 100 kompleteve – 100 proteza silikoni e 100 gjoksore, projekt i mbështetur nga Presidenca e Republikës së Kosovës, si dhe 100 paruke, donacion i Koalicioni K10 dhe Fondi për Popullsi i Kombeve të Bashkuara UNFPA Kosova, zyra në Prishtinë. Për shkak se numri është i kufizuar e nevojat janë të mëdha, ju lutemi që të vijnë zonjat, të cilat nuk janë pajisur më herët”, thuhet në njoftimin e Qendrës Kosovare për luftimin e Kancerit të Gjirit, raporton EO.
Pas takimit me strukturat drejtuese të ShSKUK-së dhe Klinikës së Onkologjisë, Osmani do të deklarohet para mediave.