Sulmuesi i Manchester United, Cristiano Ronaldo, është përjashtuar nga skuadra për ndeshjen e fundjavës në Premier League me Chelsean, në Stamford Bridge.
Vendimi i konfirmuar nga klubi të enjten, vjen një ditë pasi Ronaldo ishte një zëvendësues i papërdorur për fitoren ndaj Tottenhamit, por u largua nga fusha para se të përfundonte ndeshja dhe më pas u largua edhe nga stadiumi.
Ndërsa, United arriti një fitore mbresëlënëse 2-0 ndaj skuadrës së Antonio Contes falë golave të Fred dhe Bruno Fernandes.
Në një deklaratë thuhej “Cristiano Ronaldo nuk do të jetë pjesë e skuadrës së Manchester United për ndeshjen e kësaj të shtune kundër Chelsea. Pjesa tjetër e skuadrës është plotësisht e përqendruar në përgatitjen për atë ndeshje”, raporton Sky Sports.
Trajneri i United, Erik ten Hag, u pyet për situatën e Ronaldos drejtpërdrejt në Amazon Prime Video pas ndeshjes së Spurs, i cili ka thënë se do të “merrej” me të mëngjesin e së enjtes, kur u konfirmua se Ronaldo nuk do të paraqitej në udhëtimin e së shtunës në Stamford Bridge.
Ronaldo kërkoi të largohej nga United gjatë afatit kalimtar të verës. Ndërsa, Ten Hag këmbënguli publikisht në atë kohë, që 37-vjeçari mbeti pjesë e planeve. Ai më vonë u përgatit ta linte të largohej, duke i dërguar Sporting CP dhe Napoli-t, që të dy të eksploronin për një marrëveshje të mundshme.
Gjithashtu, mediat lokale kanë raportuar në fillim të këtij muaji se Ten Hag është i përgatitur të lërë Ronaldon të largohet në janar.