Policia e Kosovës ka njoftuar se zyrtarët policorë nga Stacioni Policor për Mbikëqyrjen e Kufirit Hani i Elezit kanë intensifikuar patrullimet dhe operacionet policore në teren.
Policia bën të ditur se të shtunën e 22 tetorit, rreth orës 08:20, njësia policore patrulluese në fshatin Seqishtë të Hanit të Elezit, ka ndaluar një automjet me targa vendore. Ky automjet drejtohej nga një i dyshuari mashkull kosovar, ku janë hasur mallra që dyshohet të jenë kontrabanduar.
Mes tjerash, në njoftimin e Policisë së Kosovës thuhet se gjatë kontrollit janë gjetur: tekstil, këpucë, pajisje elektronike e të tjerë.
“Me urdhër të prokurorit kujdestar, iniciohet rasti ‘kontrabandim me mallra’, malli konfiskohet dhe i dorëzohet pikës doganore, ndërsa personi i dyshuar lirohet ne procedurë të rregullt”, thuhet në njoftimin e policisë.
Ky rast është trajtuar nga njësitë përkatëse policore të Drejtorisë Rajonale Kufitare Lindje dhe Dogana e Kosovës.