Në ditën e dytë të Forumit për Gratë, Paqen dhe Sigurinë, ka marrë pjesë dhe ministrja e Drejtësisë, Albulena Haxhiu.
Në këtë forum, ministrja Haxhiu ka thënë se gratë në Kosovë e kanë dëshmuar fuqinë e tyre krahas vështirësive që kanë kaluar. Ajo konsideroi të pamundur qasjen gjithëpërfshirëse në adresimin e së kaluarës pa përfshirjen e gruas.
“Kosova në dekadat e fundit ka kaluar nëpër procese shumë të rëndësishme, të cilat kanë qenë vendimtare për pavarësimin e qëndrueshmërinë e saj si shtet”, tha Haxhiu.
Ministrja e Drejtësisë është shprehur se “në procesin e ballafaqimit me të kaluarën përfaqësimi i gruas dhe pjesëmarrja e saj është qenësore, për arsye se kontributi i saj ka qenë dhe vazhdon të mbetet e pazëvendësueshme”.
Mes tjerash, Haxhiu ka theksuar se në Ministrinë e Drejtësisë, 60 për qind e anëtarëve të iniciativave që merren me adresimin e krimeve të luftës janë vajza dhe gra.