Me 60 vota për, asnjë kundër dhe me një abstenim është miratuar Dokumenti për Strategjinë Kombëtare të Kosovës të viteve 2022-2027 në seancën e 24 tetorit në Kuvendin e Kosovës.
Kritika të ashpra ka pasur opozita për Strategjinë Kombëtare të Sigurisë, e cila është paraqitur nga kryeministri i Kosovës, Albin Kurti, për ta votuar në Kuvend.
Drafin e kësaj strategjie, deputeti i PDK-së, Hisen Berisha, e ka quajtur “draft mashtrues”.
“Ky draft ka karakter mashtrues në raport me votuesit tuaj, të cilëve për dy fushata rresht u keni premtuar shërbimin e detyrueshëm ushtarak”, ka thënë Berisha.
Ndërkaq, deputeti i LDK-së, Anton Quni, ka kërkuar nga kryeministri Kurti tërheqjen e dokumentit në fjalë. Sipas tij, strategjia e sigurisë e paraqitur në Kuvend është bosh.
“Unë e kam një lutje, një kërkesë, që ky dokument të hiqet, kryeministri dhe Këshilli i Sigurisë i Kosovës të sigurojë ekspertizë të lartë, të ketë në konsideratë zhvillimet globale, me theks të veçantë situatën në Ukrainë”, ka deklaruar Anton Quni.
Kritika për dokumentin e strategjisë kombëtare të sigurisë ka pasur edhe shefi i grupit parlamentar të AAK-së, Besnik Tahiri, i cili e kritikoi edhe kryeministrin Kurti, për mënyrën se si e ka paraqitur.
“Kryeministri nuk e prezantoi përmbajtjen e strategjisë, ai na tregoi për veprimet që i ka marrë në mbështetje të FSK-së. Përderisa strategjia e trajton një afat kohor pesëvjeçar”, ka thënë ai.
Ndryshe, kryeministri i Kosovës, Albin Kurti duke prezantuar Strategjinë Kombëtare të Sigurisë për vitet 2022-2027, ka thënë se është e dyta me radhë që nga shpallja e Pavarësisë së Kosovës.
Kreu i Qeverisë ka thënë se kjo është strategjia ombrellë e sigurisë së Kosovës, e cila paraqet mundësinë dhe vizionin për të ardhmen e vendit.
Ai ka thënë se me anë të kësaj strategjie, i është dhënë vëmendje e veçantë institucioneve të sigurisë.
“I kemi rritur 52 për qind buxhetin për forcën e sigurisë së Kosovës, 63 milionë sa ishte vitin e kaluar, tashmë është 102 milionë euro”, ka deklaruar Kurti.
Ndër të tjera, Kurti ka thënë se Qeveria e Kosovës ka ndarë buxhetin më të madh në historinë e forcës së sigurisë së Kosovës, duke e përafruar si shifër me vendet e NATO-s.
Opozita e kritikon dokumentin e Qeverisë për Strategjinë Kombëtare të Sigurisë