Prokuroria Themelore në Prishtinë ka nisur hetim për mosdeklarimin e pasurisë ndaj Zëvendëskryeministres së dytë të Kosovës, Donika Gërvalla, e cila njëherësh është edhe ministre e Punëve të Jashtme.
Lajmin për Portali Dukagjini, e ka konfirmuar zëdhënësja e Prokurorisë Themelore në Prishtinë, Laureta Ulaj.
“Lidhur me kallëzimin penal kundër D.G., në drejtim të veprës penale ‘Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’, iu njoftojmë se rasti është në fazën e hetimeve”, ka thënë Ulaj.
Ndryshe, Prokuroria e Shtetit, më 13 tetor, kishte ngritur aktakuzë ndaj ministres së Industrisë, Ndërmarrësisë dhe Tregtisë, Rozeta Hajdari, për mosdeklarim të pasurisë.
Lajmin e ka konfirmuar për Portali Dukagjini, zëdhënësja e Prokurorisë Themelore në Prishtinë, Laureta Ulaj.
“Më 13 tetor 2022, Prokurori i Shtetit ka ngritur aktakuzë kundër R.H, për mosdeklarim të pasurisë” – thuhet në përgjigjen e saj.
Në mars të këtij viti, Agjencia Kundër Korrupsionit (AKK) kishte dorëzuar kallëzim penal kundër ministres së Industrisë, Tregtisë dhe Ndërmarrësisë, Rozeta Hajdari.
Sipas Agjencisë, ministrja Hajdari dyshohet për mosraportim ose raportim të rremë të pasurisë, të të ardhurave, dhuratave dhe dobisë tjetër materiale ose detyrimeve financiare nga neni 430 paragrafi 1 të Kodit Penal të Republikës së Kosovës.
“Çdo person, i cili, sipas ligjit, është i detyruar të bëjë deklarimin e pasurisë, të të ardhurave, të dhuratave, të dobisë tjetër pasurore ose të detyrimeve financiare, dhe i cili nuk bën një gjë të tillë, dënohet me gjobë ose me burgim deri në tre (3) vjet. Vepra penale nga paragrafi 1. i këtij neni konsiderohet se është kryer kur deklarata nuk paraqitet brenda afatit për paraqitjen e deklaratës”, thuhet në paragrafin 1 të nenit 430 të Kodit Penal.