Vendimi i Qeverisë së Kosovës për riregjistrimin e makinave me targat nga ato të lëshuara nga Serbia në RKS, ka nisur të zbatohet në mesnatën e 1 Nentorit.
Plani i Qeverisë së Kosovës, do të zhvillohet në tri faza.
Faza e parë përfshin qortimin e shoferëve, e dyta parasheh gjobë deri në 150 euro për ata shoferë dhe e treta targa provuese.
Dhe siç raportojnë gazetarët e RTV Dukagjini nga terreni, Policia e Kosovës është duke lëshuar letra qortuese për secilin shofer makine me targa të paligjshme serbe, që hyn apo del nga territori i Kosovës drejt Serbisë.
Ish-ambasadorja e Kosovës në Itali, Alma Lama, në një bisedë në emisionin Magazina me Blerina Neziri dhe Lirik Sylmetaj, në Radio Dukagjini, theksoi se vendimi për zbatimin e reciprocitetit për targa është dashur të shtyhet nga ana e Qeverisë së Kosovës.
“Shtyerja e vendimit është kërkuar edhe nga partnerët ndërkombëtarë. Dhe kur partnerët ndërkombëtarë kanë indikacione që një vendim i tillë mund të prodhojë dhunë, atëherë duhet pasur kujdes. Gjithmonë duhet të shikohen interesat politike dhe Qeveria e Kosovës nuk do të ishte turpëruar po ta shtynte zbatimin e këtij vendimi”, ka thënë Lama për Radio Dukagjini.
Edhe njohësi i sigurisë, Drizan Shala, e sheh si vështirë të zbatueshëm dhe problematik vendimin e Qeverisë së Kosovës për targat.
“Ky vendim mund të krijojë tensione në veri të vendit dhe nëse dhuna eskalon kur nis shqiptimi i gjobave dhe konfiskimi i targave, atëherë në tavolinën e bisedimeve kryeministrin Kurti e pret një marrëveshje e shpejtë. Dhe për këtë është dashur të dëgjohen thirrjet e partnerëve ndërkombëtar për një shtyerje 10 muajshe, për të mos dal humbëse Qeveria jonë në gjithë këtë zhvillim”, ka thënë Shala për Radio Dukagjini.
Derisa janë dhënë qortimet e para nga Policia, disa qytetarë serbë janë shprehur këmbëngulës se nuk do t’i riregjistrojnë veturat e tyre, pavarësisht pasojave.
Zbatimi i këtij plani pritet të përfundojë më 21 prill dhe nga ajo datë, në qarkullim do të lejohen vetëm makina me targa RKS.