Oda e infermierëve, mamive dhe profesionistëve të tjerë shëndetësorë të Kosovës, ka marrë vendim për tërheqjen e licencës dhe fshirjen e profesionistëve shëndetësor nga regjistri për katër anëtaret e kësaj ode, të cilat janë të përfshira në sulmin fizik ndaj të moshuarës në Pejë.
Ky vendim ka hyrë në fuqi të enjten e tre nëntorit.
Aurona Pelaj, “Bachelor i shkencave në infermieri” Altina Rexhepi , “Bachelor i shkencave në infermieri” Giltiana Neziri, “Infermiere e përgjithshme” Remzije Kuqi-Gashi, “Teknik i Mjekësisë”, janë të ndaluarat e rastit në fjalë.
Ndryshe, pas publikimit të videoincizimit në rrjetet sociale të sulmit në shtëpinë e të moshuarve, Prokuroria Themelore në Pejë, të enjten e tre nëntorit ka parashtruar kërkesën për masën e paraburgimit ndaj tri infermiereve që dyshohen për sulm fizik ndaj së moshuarës.
Nga Prokuroria kanë konfirmuar për RTV Dukagjini, se kërkesa për masën e paraburgimit është dërguar në Gjykatë.
Në lidhje me këtë rast, gjatë ditës, janë arrestuar tre persona, përfshirë edhe infermieren e cila shihet në video teksa ushtron dhunë fizike dhe psikike ndaj gruas së moshuar.