Kryeministri Izraelit Yair Lapid ka uruar Benjamin Netanyahu për fitoren e tij në zgjedhjet e përgjithshme të së martës së 1 nëntorit.
Lapid ka thënë se kishte telefonuar rivalin e tij për t’i uruar fat dhe për t’i thënë se do të siguronte një tranzicion të rregullt të pushtetit.
Partia Likud e Netanyahut dhe aleatët e saj të ekstremit të djathtë dhe fetarë kanë fituar 64 nga 120 vendet në parlament, sipas rezultateve përfundimtare të publikuara të enjten e 3 nëntorit.
Rezultati i jep fund një periudhe të paprecedentë bllokimi politik që ka filluar në vitin 2019, kur zoti Netanyahu ishte akuzuar për ryshfet, mashtrim dhe shkelje të besimit, të cilat ai i ka mohuar.
Pasi sondazhet kanë parashikuar se ai do të siguronte një shumicë, Netanyahu iu ka thënë mbështetësve të Likud se ai do të krijonte një qeveri që “do të kujdesej për të gjithë qytetarët e Izraelit, pa përjashtim, sepse shteti është i yni”, raporton BBC.
“Ne do të rivendosim sigurinë, do të ulim koston e jetesës, do të zgjerojmë rrethin e paqes edhe më tej, ne do të rivendosim Izraelin si një fuqi në rritje midis kombeve”, ka theksuar ai.
Ndërkaq ShBA-të të mërkurën e 2 nëntorit kanë thënë shpresojnë se “të gjithë zyrtarët e qeverisë izraelite do të vazhdojnë të ndajnë vlerat e një shoqërie të hapur, demokratike, duke përfshirë tolerancën dhe respektin për të gjithë në shoqërinë civile, veçanërisht për grupet e pakicave”.