“Kjo është karta e fundit e Vuçiqit, në përpjekje për të manipuluar me situatën në veri të vendit”.
Kështu është shprehur analisti, Imer Mushkolaj për Portalin Dukagjini, pas vendimit të Listës Serbe për bojkotimin e institucioneve të Kosovës.
Në takimin e mbajtur në Zveçan, Kryetari i Listës Serbe, Goran Rakiq dhe katër kryetarët e komunave me shumicë serbe në veri të Kosovës, kanë vendosur për bojkotimin e institucioneve të Kosovës. Sipas Mushkolaj, një situatë e tillë paraqet një sfidë për institucionet e vendit.
“Kjo është karta e fundit e Vuçiqit në përpjekje për të manipuluar me situatën në veri të vendit. Por, po ashtu, është një sfidë për institucionet e Kosovës se si t’i japin zgjidhje situatës së krijuar, duke pasur parasysh gjendjen e brishtë të sigurisë”, ka deklaruar Mushkolaj.
Përveç zyrtarëve policorë, punonjësve të gjykatave dhe institucioneve të tjera, dorëheqje kanë dhënë edhe kryetarët e komunave veriore dhe Goran Rakiq, nga pozita e ministrit për Komunitete dhe Kthim në Qeverinë e Kosovës.
Përveç kësaj, zyrtarë të Policisë së Kosovës janë parë duke i zhveshur uniformat e policisë.
