Kryetari i Partisë Demokratik të Kosovës (PDK), Memli Krasniqi, ka treguar për periudhën pas pavarësisë së Kosovës, ku asnjë qeveri nuk kishte arritur të përfundonte mandatin e rregullt.
Më tej, ai ka thënë se është skeptik dhe nuk beson se Qeveria Kurti II do ta përfundojë mandatin në kohë të rregullt.
Sipas Krasniqit, fundi i kësaj qeverie mund të vijë vetëm nëse kryeministri dorëzohet.
“Unë shpresoj që kryeministri që ka marrë besimin e kaq shumë qytetarëve nuk është njeri që dorëzohet”, ka deklaruar ai.
“Nëse ai dorëzohet, ne jemi të gatshëm të marrim përgjegjësitë për të udhëhequr me vendin”, është shprehur Krasniqi.
Më tej, lideri i PDK-së ka diskutuar edhe për formimin e Asociacionit ku ka thënë “askush nuk kërkon nga Kosova që ta krijojë një Republika Serpska të re” edhe sipas tij “askush nuk ka kërkuar as në të kaluarën nga Kosova që të krijojë Asociacion që nuk është në pajtim me Kushtetutën”.
Ai ka thënë se Plani franko-gjerman e ka në agjendë të diskutimeve edhe çështjen e Asociacionit.
Prandaj “kryeministri Kurti duhet ta trajtojë seriozisht këtë koncentrim të interesimit dhe të ndihmesës ndërkombëtare, të angazhohet në diskutim të planit dhe t’i shprehë qëndrimet e Kosovës duke përfshirë edhe Asociacionin. Por, gjithsesi në pajtim me Kushtetutën dhe me aktgjykimin e Gjykatës Kushtetuese dhe pa e rrezikuar karakterin unitar të shtetit tonë, sovranitetin dhe integritetin territorial”, ka përfunduar Krasniqi.