Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka bërë të ditur se AAK-ja pas konsultimeve me ekspertë për adresimin e buxhetit 2023 që do të jetë në rend dite në seancën e radhës do të prezantojë një amendament që lidhet drejtpërdrejt me nevojën për ngritje lineare të pagave të zyrtarëve publikë në të gjitha nivelet për 30 për qind, përveç atyre me emërime politike.
Ai ka kritikuar qeverinë duke thënë se nuk i ka miratuar ligjet vitale për të cilat ka pasur premtime.
“Qeveria i ka gënjyer 80 mijë familje duke u thënë se do të sjellë ligjin e pagave dhe mbi të gjitha duke mos e vendosur në buxhet vijën e cila do të futë në zbatim ligjin e pagave dhe koeficientin”, ka deklaruar Tahiri.
Sipas tij, qeveria ka mashtruar qytetarët dhe zyrtarët publikë, pasi nuk ka përmbajtur premtimin për ligjin e pagave.
“Është goditje ndaj njerëzve që nuk munden as pushimin e drekës ta kryejnë me ato para. Është e padrejtë, joserioze, një qeveri që ka trumbetuar në mbështetje të sektorit publik”, ka deklaruar Tahiri.
Ai ka thënë, ndër të tjera, se ministri i Financave, Hekuran Murati e ka në dorë ngritjen e pagave për sektorin publik, gjersa ka shtuar se “nuk ka sjellë ligjin e pagave, as koeficientin”.
“Nuk ka logjikë normale që një ministër i thotë një sektori privat rritni rrogat se i keni rritur fitimet, ndërsa këtij që i është rritur buxheti nuk e bën të njëjtën”, ka vijuar ai.
Ndërkaq, deputeti Pal Lekaj njëherësh anëtar i Komisionit për Buxhet e Financa, ka thënë se kjo ngritje e pagave do të kërkohet deri në miratimin e ligjit për paga.