Analisti Ylli Hoxha ka thënë se ajo ç’ka i lë përshtypje është ajo çka Kryeministri Albin Kurti flet për Asociacionin e komunave me shumicë serbe duke thënë se nuk e pranon një të atillë mbi baza etnike. Sipas tij, një deklaratë e tillë lë të nënkuptohet se mund të ketë një asociacion me baza të tjera.
I ftuar në Debat Plus të RTV Dukagjini, Hoxha ka thënë se Kurti e ka të qartë se ndonëse është kundër, kërkesat e faktorit ndërkombëtar nuk zhbëhen.
“Besoj se Kurti e ka të qartë pse nuk e kanë implementuar dhe e kanë të qartë se fakti që ka qenë kundër këtij propozimi nuk e amneston gjatë të qenurit kryeministër, nuk i zhbën kërkesat e faktorit ndërkombëtar ndaj teje … Çka më lë përshtypje është baza mbi të cilën e akuzon asociacionin, është për t’u analizuar. Ai flet për një asociacion mbi baza etnike dhe me këtë nënkupton se mund të kemi asosciacion me baza të tjera”, ka deklaruar Hoxha.
Sipas Hoxhës, të dëgjuarit nga Kurti se do të ketë policë dhe gjykatës të rinj, shtyen serbët të tregojnë besnikërinë e tyre.
“Mendoj që kur dëgjoj nga Kurti se do kemi policë të rinj, gjykatës të rinj, i bjen serbët para një presioni për të treguar lojalitetin (besnikërinë) që kanë dhe nuk mendoj se është rrugë që sjell sukses. Zëvendësimi i 500 policëve është një përpjekje që do të ketë mossukses nëse nuk ka një konturë prapa saj”, ka deklaruar ai.
Krahas kësaj, sipas tij, komunikimi me ndërkombëtarët duhet të jetë më intenziv përgjatë ditëve në vazhdim.
Në një intervistë për DW, Kurti kishte deklaruar se nuk do të ketë një asociacion mbi baza etnike dhe se dialogu Kosovë-Serbi s’ecën përpara pa njohjen reciproke.