Të premten e 18 nëntorit, deputeti i LVV-së Halil Thaçi ka akuzuar kryetarin e Mitrovicës dhe deputetin e PDK-së, Bedri Hamza për takim me përfaqësuesit e Listën Serbe.
Përmes një postimi Thaçi ka thënë se kryetari Hamza ka mbajtur takim dyorësh me përfaqsuesit e Listës Serbe në një nga restorantet e fshatit Milloshevë të Kastriotit.
“Është e rrezikshme dhe shqetësuese se si subjekti që para ca ditësh tha se po lëshon institucionet e Republikës së Kosovës, po lufton çdo ditë shtetin tonë, konsultohet çdo ditë me Vuçiqin sot takohet edhe me një parti të opozitës në Kosovës”, ka shkruar Thaçi.
Pas këtij postimi ka reaguar kryetari i Mitrovicës, Bedri Hamza duke thënë se ka zhvilluar një drekë pune me kryetarin e Vushtrrisë, Ferit Idrizi dhe kryetarin e Skenderajit, Fadil Nura.
Tutje ai shtoi se nuk ka parë dhe nuk ka biseduar se me asnjë anëtar apo deputet të Listës Serbe.
“Sa i perket gënjeshtrave dhe shpifjeve të deputetit të Vetëvendosjes, Halil Thaçi, do të ballafaqohemi së shpejti në gjykatë!”, ka shkruar Hamza.
Pas reagimit të Hamzës, deputeti i LVV-së ka thënë se “Unë kam fakte dhe shihemi në gjykatë”.