Ministrja e Energjisë, Artane Rizvanolli ka njoftuar se me ftesë të ministrit grek për Energji dhe Mjedis, Kostas Skrekas, ka marrë pjesë në Dialogun e parë Ministror të Energjisë në Athinë.
Ministrja Rizvanolli në këtë ngjarje ka marrë pjesë së bashku me ministrat Balluku nga Shqipëria, Hristov nga Bullgaria, Popescu nga Rumania, si dhe Pichetto Fratin nga Italia.
“Fokusi kryesor i kësaj konference është Siguria e Energjisë e cila mund të arrihet vetëm përmes bashkëpunimit të ngushtë mes shteteve mike e partnere, në të cilin varen pavarësia dhe siguria energjetike e Evropës”, ka thënë Rizvanolli.
Sipas Rizvanollit, është kritike që ky bashkëpunim të ndërtohet jo vetëm duke u bazuar në zhvillim ekonomik por në vlerat tona të përbashkëta evropiane, të paqes e demokracisë.
“Takime të tilla domethënëse e të frytshme në nivel politik e edhe më të shpeshta në atë teknik janë tejet të rëndësishme për të shfrytëzuar plotësisht komplementaritetin tonë energjetik, për të tejkaluar kështu krizën si dhe zhvilluar më tej sektorin”, ka shkruar tutje ministrja e Energjisë, Artane Rizvanolli.