Presidenti i Ukrainës ka treguar se gjashtë milionë familje ukrainase janë ende pa energji elektrike, pas sulmeve me raketa që goditën vendin këtë javë.
“Që nga kjo mbrëmje, ndërprerjet e energjisë vazhdojnë në shumicën e rajoneve dhe në Kiev”, ka thënë Volodymyr Zelensky.
Numri i familjeve të prekura është ulur përgjysmë që nga e mërkura, ka shtuar Zelensky.
Por sipas tij miliona njerëz kanë mbetur pa dritë, ujë apo nxehtësi me fillimin e dimrit.
Tutje, Zelensky ka treguar se kryeqyteti dhe rajoni përreth tij janë ndër më të prekurit nga sulmet. Ai ka thënë se shumë banorë në qytet kanë qenë pa energji “për 20 apo më shumë se 30 orë”.
Gjersa, ka theksuar se ndër zonat më të prekura janë rajonet e Odesës, në jug, Lviv në perëndim, si dhe Vinnytsia dhe Dnipropetrovsk që janë më qendrore.
Presidenti Zelensky u ka bërë thirrje të gjithëve që të përdorin pajisjet që përdorin energjinë me kursim, “Nëse nuk keni ndërprerje të energjisë, kjo nuk do të thotë se problemi ka mbaruar. Ju lutem, nëse keni energji elektrike, kjo nuk do të thotë se mund të ndizni disa pajisje elektrike të fuqishme në të njëjtën kohë “, shkruan BBC.
“Duhet të durojmë këtë dimër, një dimër që do ta kujtojnë të gjithë”, ka thënë ai.
Kryeministri Denys Shmyhal ka thënë se pavarësisht sulmeve, pothuajse e gjithë infrastruktura kritike e vendit është rilidhur duke përfshirë gjëra të tilla si shërbimet e ujit, impiantet e prodhimit të nxehtësisë, spitalet dhe shërbimet e urgjencës.
Por njerëzit e zakonshëm vazhdojnë të përballen me ndërprerje të planifikuara të energjisë elektrike në çdo rajon të Ukrainës, ka theksuar ai.
Ekziston frika se shënjestrimi i infrastrukturës ukrainase nga Rusia, së bashku me borën dhe temperaturat nën zero, mund të shkaktojë një krizë shëndetësore në vend.