Presidenti francez, Emmanuel Macron ka thënë se kishte zhvilluar një bisedë “të qartë dhe të sinqertë” me pronarin e Twitter, Elon Musk.
Macron ka bërë të ditur përmes një postimi në rrjetin social Twitter se me Elon Musk ka folur rreth monitorimit dhe kontrollit të përmbajtjes së rrjetit social dhe një bisedë e tillë erdhi një ditë pasi udhëheqësi francez shprehu shqetësimin për këtë çështje.
“Një politikë transparente ndaj përdoruesve, një forcim i konsiderueshëm i kontrollit të përmbajtjes dhe mbrojtja e lirisë së fjalës këto janë gjërat që Twitter duhet të përmbushë në mënyrë që të jetë në përputhje me rregulloret evropiane”, ka shkruar Macron në Twitter.
Teksa, ka theksuar se është diskutuar njashtu edhe për projektet e ardhshme që lidhen me prodhimet elektrike.
In line with our ambition for decarbonizing and reindustrializing France and Europe, with @elonmusk we exchanged on future green industrial projects, such as manufacturing of electric vehicles and batteries. pic.twitter.com/uolbo1mTzg
— Emmanuel Macron (@EmmanuelMacron) December 2, 2022
“Në përputhje me ambicien tonë për dekarbonizimin dhe riindustrializimin e Francës dhe Evropës, me Elon Musk shkëmbyem për projektet e ardhshme industriale të gjelbërta, si prodhimi i automjeteve elektrike dhe baterive”, ka theksuar Macron.
I pari i shtetit francez, i cili po viziton ShBA-në, tha në emisionin “Mirëmëngjesi Amerikë” se duhet të ketë “përgjegjësi dhe kufij” për lirinë e fjalës.
Ndryshe, Musk bleu Twitterin më 27 tetor, duke paguar 44 miliardë dollarë.