Kryeministri i Shqipërisë, Edi Rama, ka thënë se është ngjarje historike dhe e jashtëzakonshme mbajtja e samitit të BE-së në Tiranë.
Ai para gazetarëve në hyrje të këtij samiti ka thënë se “është diçka që as në imagjinatën tonë nuk do ta kishim përfytyruar se ky samit do të ndodhë”.
I pyetur për dialogun Kosovë-Serbi dhe se kur do të arrihet një marrëveshje finale, Rama ka thënë se “Unë do të kisha dëshirë që BE të kishte një lloj magjie për këtë”.
Ai shpreson që Kosova dhe Serbia të arrijnë të gjejnë një marrëveshje përfundimtare në këtë samit, por sipas tij, me shumë mundësi këtu nuk do të ndodhë.
“Gjërat janë pak më të vështira se kaq. Ka një ndryshim shumë të madh, sepse këtu është ‘Rock & Roll’, në Bruksel është vetëm simfoni”, ka thënë Rama.
Rama ka thënë se Ballkani Perëndimor nuk ka qenë më mirë asnjëherë në historinë e vet, duke shtuar se edhe BE-ja ka nevojë për Ballkanin Perëndimor dhe anasjelltas.
“Ballkani Perëndimor nuk ka qenë kurrë më mirë në historinë e vet. Dhe shqiptarët, veçanërisht në Shqipëri e Kosovë, nuk kanë qenë më mirë në historinë e tyre”.
Ai ka bërë një gafë para gazetarëve duke u thënë “Deri dje kishim një mot këtu si në BE. Por sot iu sollëm diellin, shpresoj ta vlerësoni”.