Lidhja Demokratike e Kosovës ka dënuar sulmet e sotme në veri të vendit ndaj zyrtarëve policorë e atyre komunalë të zgjedhjeve.
“Lidhja Demokratike e Kosovës po ndjek me shqetësim të thellë ngjarjet e fundit në veri të vendit, sulmet ndaj institucioneve dhe ndaj rendit kushtetues të Republikës. LDK-ja dënon sulmet e sotme dhe kërkon që, të gjithë ata që janë përfshirë të identifikohen dhe sa më parë të vihen para institucioneve të drejtësisë”, thuhet në njoftimin e LDK-së.
LDK-ja ndër të tjera vlerëson se në këto momente është e domosdoshme që institucionet e Kosovës, të koordinojnë të gjitha veprimet me partnerët, me qëllim të ofrimit të sigurisë për gjithë qytetarët e vendit dhe institucionet e pavarura.
“Qetësia, siguria dhe ushtrimi i sovranitetit në tërë territorin e vendit nuk kanë alternativë. LDK-ja kërkon nga Qeveria qartësi dhe plan konkret për gjendjen në veri”, thuhet tutje.