Një nga pikat e diskutimit në mbledhjen e Kryesisë së Kuvendit, ka qenë edhe themelimi i komisionit hetimor për menaxhimin e krizës me energjinë.
Shefi i Grupit Parlamentar të AAK-së, Besnik Tahiri, pas kësaj mbledhje ka thënë se nuk do të marrin pjesë në asnjë votim, as në Kuvend e as në komisione të ndryshme, nëse nuk themelohet komisioni i kërkuar.
“Qëndrimi i AAK-së është i thjeshtë, kërkesa për një komision hetimor është bërë nga kryetari i deputetëve të PDK-së, nënshkrues janë deputetët individualisht. Për vlerësimin tim është e habitshme dhe e pakuptimtë dhe zgjon kureshtje se cila është arsyeja që LVV-ja e kundërshton hetimin”, ka deklaruar Tahiri.
Sipas Tahirit, Qeveria ka frikë nga gjetjet që mund të dalin nga puna e komisionit hetimor për energji. Sipas tij, refuzimi për themelimin e komisionit po bëhet me direktivat e kryeministrit Kurti.
“Është e habitshme dhe zgjon kureshtje të madhe se pse shumica VV e kundërshton këtë, çfarë janë duke fshehur që nuk po e lejojnë themelimin e këtij komisioni. Është e pakuptimtë, dhe çfarë është duke fshehur shumica me direktivë të Qeverisë dhe kryeministrit Kurti”, ka shtuar Tahiri.