Në “Lagjen e Boshnjakëve” të Mitrovicë Veriore situata është e qetë. Policia e Kosovës po patrullon në udhëkryqin kryesor dhe nëpër lagje ndërsa një veturë e karabinierëve italian po qëndron në hyrje të lagjes nga pjesa e hyrjes veriore.
Në Rudarë në hyrje të Sveçanit rruga vazhdon të mbetet e bllokuar. Kamionët po qëndrojnë në vendin ku janë vendosur mbrëmjen e së shtunës, ndërkaq nuk shihen protestues apo persona të maskuar.
Dy vetura të KFOR-it polak po qëndrojnë afër barrikadave ndërsa po patrullojnë edhe forca të EULEX-it.
Ndërkaq, EULEX-i ka njoftuar se një patrullë iu është sulmuar me shok-bombë mbrëmjen e së shtunës në afërsi të Rudarës, ku janë vendosur barrikadat në veri të vendit.
EULEX-i ka thënë se nuk ka të lënduar dhe nuk janë shkaktuar dëme materiale.
“Asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale”, thuhet në njoftimin e tyre, raporton Portali Dukagjini.
Në njoftimin e tyre, EULEX thekson se ky sulm dhe sulmet e tjera ndaj zyrtarëve policorë të Policisë së Kosovës, janë të papranueshme dhe i dënon fuqishëm.
Nga sulmet në veri me shok-bomba e po ashtu, me armë zjarri ndaj zyrtarëve policor të Kosovës. Të dielën e 11 dhjetorit do të mblidhet Këshilli i Sigurisë së Kosovës, kështu ka njoftuar Qeveria e Kosovës.
Kryeministri i Republikës së Kosovës, Albin Kurti dhe Ministri i Punëve të Brendshme, Xhelal Sveçla do të mbajnë konferencë për media, pas mbledhjes së Këshillit të Sigurisë.
Konferenca për media do të fillojë në ora 12:30, sipas njoftimit të Qeverisë.
Policia e Kosovës tashmë ka mbyllur rrugët që çojnë për në pikëkalimet kufitare Jarinjë dhe Bërnjak që lidhin Kosovën dhe Serbinë, duke e konsideruar këtë vendim si masë paraprake të sigurisë.