Deputeti i Listës Guxo, Haxhi Avdyli, ka thënë se kërcënimi serb për kthimin e një mijë ushtarëve serbë në Kosovë, është thirrje e pastër për luftë dhe pushtim të Kosovës.
“Kjo do të thotë djegie, shkatërrim dhe një kërcënim për gjenocid të ri”, ka shkruar Avdyli.
Sipas tij, të gjitha veprimet destabilizuese me barrikada, përmes një grushti kriminelesh në veri dhe ndjellje të frikës e defetizmit përmes argatëve shqiptarë në jug “kanë qëllimin e njëjtë që me shekuj kanë pasur – zhdukjen e shqiptarëve nga trojet e tyre”.
Avdyli ka theksuar se “etja e tyre për gjak po përcillet edhe në gjeneratat e reja”.
Mes tjerash, ai shtoi se Kosova nuk duhet “të lëkundet asnjë milimetër, por edhe duhet të përgatitet ushtarakisht për t’ia dhënë Serbisë goditjen edhe më të madhe se në vitin 1999”.