Presidenti i Turqisë, Recep Tayyip Erdogan, ka pritur në takim një grup të deputetëve të Kuvendit të Kosovës.
Deputeti i Partisë Demokratike të Kosovës, Mërgim Lushtaku, me anë të një postimi në Facebook ka njoftuar se presidenti turk gjatë takimit u ka premtuar se Turqia do të vazhdojë ta mbështesë Kosovës në të gjitha fushat.
“Në Kuvendin e Madh Turk, u mirëpritëm ngrohtësisht nga miku i madh i shqiptarëve, Presidenti Recep Tayyip Erdogan. Mikpritja, modestia, afërsia, janë disa nga tiparet që e karakterizojnë këtë lider të përmasave botërore”, ka shkruar Lushtaku.
“Turqia do të vazhdojë të mbështes popullin e Kosovës në të gjitha fushat”, ishin fjalët e Erdoganit, shkruan më tej deputeti Lushtaku.
Ai ka theksuar se Turqia është partnere strategjike e cila ka mbështetur pa rezervë forcimin e subjektivitetit ndërkombëtar të vendit tonë.
“Në vazhdën e zhvillimeve të fundit, roli i Presidentit Erdogan është shumë i rëndësishëm për garantimin e paqes dhe stabilitetit në Ballkan”, thuhet në njoftim.