Partia Demokratike e Kosovës dhe Lidhja e Demokratike e Kosovës, kanë kërkuar nga ekzekutivi rishikim të buxhetit, raporton Ekonomia Online.
Ferat Shala, deputet nga radhët e PDK-së, ka thënë se opozita ende nuk e ka parë draftin e planifikimit të buxhetit. Sipas tij, një rishikim buxhetor që do t’i ridestinonte mjetet e investimeve duhet të vijë sa më shpejt.
Sipas Shalës, rishikimi i buxhetit do të ndihmonte në rimëkëmbjen ekonomike te bizneset e vogla dhe të mesme.
“Do të duhej të kishim buxhet të qartë për sigurinë e vendit, për shkak të agjendës që kemi linja të forta buxhetore që i përgjigjen situatës së sigurisë. Një buxhet që do të plotësonte kërkesat sociale e në këtë rast do të duhej të kishim buxhet i fillimit të zbatimit të Ligjit të pagave dhe do të duhej të kishim buxhet që do të ndihmonte rimëkëmbjen ekonomike te ndërmarrjet e vogla dhe të mesme”, ka deklaruar ai për EO.
Shala ka kritikuar mjetet e ndara prej 100 eurosh nga Qeveria e Kosovë, sipas tij, shpërndarja e këtillë e mjeteve financiare nuk do të ketë asnjë efekt pozitiv ekonomik.
“Ne kemi pritur se do të kemi investime të mëdha në sektorët prodhues, të cilët nuk po ndodhin në këtë vit të qeverisjes Kurti, asnjë veprim investues në ndërmarrje publike e as në sektorin privat. Kemi shtangnim në kuptimin investiv dhe zhvillimor të vendit. Janë bllokuar shumë projekte të mëdha kapitale dhe investitorë strategjikë”, ka thënë Shala.
Kritika për qeverinë pati edhe Driton Selmanaj, deputet i LDK-së. Ndarjen e 100 eurove nga qeveria e ka quajtur veprim popullist. Sipas tij, kjo është një ndihmë afatshkurtër dhe se qeveria duhet të ndërtojë politika ekonomike në planin afatgjatë.
“Rishikimi i buxhetit në muajt qershor dhe korrik mund të na vijnë në Kuvend. Nuk kam informata për çështje konkrete se çfarë po ndodh. Kjo Qeveri nuk ka plan si t’i adresojë shumë çështje, dhe tani nxjerr instrumente populiste të pavlera për të shpërndarë nga 100 euro për qytetarë. Qeveria nuk është për këtë çasje stihike të paorganizuar, Qeveria duhet të ndërtojë politikë ekonomike, dobitë e asaj politike të jenë jetëgjate”, ka deklaruar Selmanaj.
Buxheti aktual i Kosovë, sipas Selmanajt, është buxhet konsumues dhe jo siç duhet të jetë.