Kryeministri i Kosovës, Albin Kurti, e ka uruar Arben Taravarin, kryetarin e sapozgjedhur të subjektit politik “Aleanca për Shqiptarët”.
Ky urim i Kurtit vjen në emër të tij, si kryetar i Lëvizjes Vetëvendosje.
“Në emër të Lëvizjes VETËVENDOSJE, dëshiroj t’ju uroj për zgjedhjen tuaj në krye të subjektit politik ‘Aleanca për Shqiptarët’”.
Sipas Kurtit, shqiptarët në rajon kanë nevojë për subjekte që kontribuojnë me demokratizim, qeverisje të mirë dhe luftë kundër korrupsionit.
“Koha jonë moderne vetëm kështu e mundëson realizimin e aspiratave kombëtare. Uroj që Aleanca për Shqiptarët të njohë sukses me udhëheqjen tuaj, nën shembullin e rritjes së madhe që arriti edhe gjatë udhëheqjes së Ziadin Selës”.
“Paraardhësi juaj, Dr. Ziadin Sela, ashtu si edhe vetë ju, na jeni gjendur pranë në shumë aktivitete e fushata të Lëvizjes sonë në Kosovë dhe për këto ju jemi shumë mirënjohës. Si subjekt, jua dimë për faleminderit dhe e çmojmë shtrenjtë bashkëpunimin me ju”, shtoi ai.
Ndryshe, Taravari ishte zgjedhur ushtrues i detyrës së kreut të partisë shqiptare në Maqedoninë e Veriut “Aleanca për Shqiptarët”.
Taravari kishte marrë drejtimin e partisë pas tërheqjes së Ziadin Selës, i cili para Kuvendit Qendror kishte bërë të ditur se do të tërhiqet nga pozita e shefit të partisë, por jo edhe nga politika.