Mbrëmja e së martës në Radio Dukagjini është nata e muzikës live me artistë të rinjë e shumë të talentuar.
Sonte në kuadër të emisionit “Super TrenD” me Drilona Shalën ishte e ftuar këngëtarja Greta Azizi, e cila përformoi live në studion e Radio Dukagjinit.
Greta me prejardhje nga Kamenica, ka nisur të merret me muzikë qysh në moshë të re. Ajo ishte pjesë e Gjeniut të Vogël edicionit të 7të, në vitin 2016 kur kishte vetëm 13 vjet. Ajo pati sukses në këtë garë duke mbërritur në 4 këngëtarët më të mirë të kompeticionit.
Azizi thotë se “Gjeniu i Vogël” ishte eksperienca më e mirë në jetën e saj, e cila e ka pjekur profesionalisht duke i hapur rrugët e duke e përgatitur për të ardhmen në muzikë, duke e motivuar të vazhdojë më tutje.
Ajo ka marrë pjesë në shumë festivale të ndryshme. Në “Albanian Star” në vitin 2017 ka fituar çmimin e parë, në festivalin “Amar” fitoi po ashtu çmimin e parë, teksa në “Fest Flaka” ka marrë pjesë 3 herë, duke fituar 2 çmime. Ishte pjesë e “Këngës Magjike” në vitin 2019 me këngën “Senorita”, teksa në vitin 2021 ishte pjesë e “Nota Fest” me këngën “Asnjëherë“.
Azizi studion në Fakultetin e Arteve, dega Pedagogji e Përgjithshme e Muzikës, tash viti i tretë. Ajo thotë se pas përfundimit të studimeve nuk pretendon të bëhet profesoreshë e muzikës, pasi më shumë synon skenën e muzikës, dhe dëshiron të vazhdojë në këtë drejtim.
Pikënisje dhe motivim në muzikë, Azizi e cilëson motrën e saj e cila e ka ndihmuar shumë në këtë drejtim. Ajo ka shkruar edhe teksin e këngës “Asnjëherë“ e cila është kënga e fundit e Gretës.