Presidenti i Shqipërisë, Bajram Begaj, ua ka uruar festën e Vitit të Ri të gjithë shqiptarëve anë e mbanë.
Në adresimin e tij për këtë fundvit, ai ka theksuar se situata e rëndë dhe e patolerueshme e krijuar në veri të Kosovës duhet të marrë fund.
Megjithatë, sipas tij rruga e vetme për zgjidhje të problemeve në Kosovë është dialogu dhe respektimi i integritetit.
“Provokimet dhe gjuha e kërcënimeve nuk janë gjuha me të cilën mund të flitet, vetëm dialogu dhe respektimi i integritetit të Republikës së Kosovës janë rruga e vetme e zgjidhjes së problemeve”, ka thënë Begaj në adresimin e fundvitit.
Ai ndër të tjera, ka shtuar se Shqipëria do të vazhdojë mbështetjën e saj për Kosovën në rrugën drejt integrimit euroatlantik.
“Shqipëria do të vazhdojë ta mbështesë Kosovën në rrugën e saj të integrimit euroatlantik, për anëtarësimin, sa më të shpejtë të saj në NATO dhe në Bashkimin Evropian”, ka thënë Begaj.
Begaj, njashtu ka falënderuar gjithë shqiptarët që punojnë në Shqipëri, ka falënderuar gazetarët dhe gjithë profesionistët tjerë për punën e tyre. Teksa, ka thënë se drejtësia nuk është dhe nuk duhet të shihet si një privilegj por si një domosdoshmëri.
“Viti që po vjen do të jetë një vit zgjedhor, ndaj të gjithë aktorët dhe institucionet, duhet të garantojnë një proces zgjedhor të qetë e brenda të gjitha standardeve më të larta demokratike. Konfliktualiteti, gjuha e urrejtjes dhe e mërive partiake, fragmentarizimi i energjive politike, opozicioni i fjalëve dhe jo i zgjidhjeve, duhet t’i mbeten së shkuarës. Është koha të kuptojmë se lufta jonë nuk është me njëri-tjetrin, por me varfërinë, me korrupsionin, me krimin dhe pasigurinë për një të ardhme më të mirë, të ndërtuar në trojet tona, për t’i thënë ndal braktisjes së atdheut. Të gjitha partitë politike duhet të rigjejnë frymën e dialogut dhe bashkëpunimit, duke e parë njëri tjetrin si përfaqësues të bindjeve të ndryshme por me një qëllim të përbashkët: përparimi i Shqipërisë”, ka thënë ai.