Deputeti i Lëvizjes Vetëvendosje (LVV), Haki Abazi, ka thënë se tendenca për ta përkufizuar plagosjen e së premtes në Shtërpcë, në vija etnike, tregon se nuk ka reagime të mençura dhe asnjë qëllim të mirë.
Plagosja e dy të rinjve nga komuniteti serb në Shtërpcë, të premten, ka nxitur reagime të shumta në vend e krahas tyre, edhe atë të deputetit Abazi. Ai ka thënë se çka duhet ndërmerret para përkufizimit në baza etnike, janë rezultatet.
“Shumë pak reagime dhe shumë pak vizita ka pasur polici i njësisë speciale, Ekrem Neziri, kur është plagosur më 8 dhjetor nga bandat kriminale në veri. Plagosja në Shtërpcë, mund të jetë një aksident, në mos edhe skenar për t’i fajësuar shqiptarët, mund të dënohet si akt, por çka do që është, ngulmimi e tendenca për ta përkufizuar ngjarjen në vija etnike, po tregon që as reagim të mençur dhe as qëllim të mirë nuk ka. Durim, le të pritet rezultati para se të bëhemi gramafonet e zërave dhe qëllimeve të gabuara!”, ka deklaruar ai.
Ndryshe, të premten e 6 janarit, dy të rinj, njëri 11 vjeç dhe tjetri 21, janë plagosur në Shtërpcë. I dyshuari është arrestuar më vonë atë ditë, dhe sipas deklarimit të ministrit të Mbrojtjes, Armend Mehaj, i dyshuari është pjesëtar i FSK-së.
Në shenjë revolte, komuniteti serb vendosi barrikada në Shtërpcë, të cilat u larguan po atë ditë.