Kryeministri i Kosovës, Albin Kurti, ka thënë se përgjatë vitit 2022, Qeveria e Kosovës ka vazhduar me zbatimin e ligjshmërisë në gjithë territorin e Republikës.
Përmes një postimi në Facebook, kreu i ekzekutivit ka thënë se gjatë vitit të kaluar, u realizuan 854 operacione policore kundër krimit të organizuar dhe kontrabandës, u arrestuan 3202 persona, prej tyre 301 zyrtarë publikë, mbyllën 16 rrugë ilegale në veri të vendit dhe se kanë shkatërruar 69 grupe kriminale.
“U konfiskuan mbi 1.8 tonë substanca narkotike; Shkatërruam 5 laboratore të drogës në veri të Kosovës, me vlerë qindra milionëshe në substanca dhe në pajisje si dhe 3 laboratore për prodhimin e kriptovalutave, po ashtu në veri; Mbi 14 milionë euro janë ngrirë nën dyshimin e keqpërdorimeve dhe shpërlarjes së parave”, ka vijuar Kurti.
Ndër të tjera, kryeministri ka vijuar duke thënë se janë sekuestruar mbi 300 mijë litra karburante që s’ishin konform me aktet nënligjore, janë ndërtuar 4 objekte dhe stacione policore në veri të Kosovës si dhe është bërë shtrirja e rrjetit optik në atë pjesë të vendit, duke mundësuar shtrirjen e valëve telefonike, rrjetit të internetit dhe komunikimit me radiolidhje.
Po ashtu, ai ka theksuar se është krijuar edhe Njësiti i Ndërhyrjes së Shpejtë të Kufirit, në kuadër të Policisë së Kosovës, i cili angazhohet në luftimin e kontrabandës, trafikimit me qenie njerëzore dhe keqpërdorimeve të tjera përgjatë vijës kufitare.